கீர்த்தனை இன்பம் துய்க்க வாரீர் - பகுதி-1

"யான் பெற்ற இன்பம் பெறுக இவ்வையகம்" என்றார் ஒரு புலவர். அது
போன்று தென்னிந்திய கிறிஸ்தவக் கீர்த்தனைகளின் தோற்றம், ஆழ்ந்த இறையியல்
கருத்துக்கள்! பாடிய ஆசிரியர்களின் பக்திமிக்க வாழ்க்கை வரலாறு, கீர்த்தனைகளின்
பொருளுக்கேற்ற பொருத்தமான இராகத்தேர்வு!

ஒரு கீர்த்தனைக்கு பலராகங்கள் வந்த வரலாறு! ஒரே இராகத்தில் பல கீர்த்தனைகள் தோன்றிய காரணம் வந்தவிதம், போன்றவைகளை நுணுகி ஆராயும்போது, வெளிப்படும் கருத்துக்கள் தரும் இன்பத்தை சொல்லி மாளாது. மாந்தி மாந்தி அனுபவித்தால் மட்டுமே அது விளங்கும.

கிறிஸ்தவக் கீர்த்தனைகளில் தோற்றத்திற்கு காரணமே ஒரு சுவையான
நிகழ்வு ஆகும். ஆரம்பகால கிறிஸ்தவர்கள் அனைவருமே இந்து சமயத்தில் இருந்து
ஆண்டவரை ஏற்றுக்கொண்டு, மணம் மாறி, மதம் மாறியவர்கள்.

மதம் மாறினாலும் இந்து சமயத்தின் கலாச்சாரம் எளிதில் விலகியபாடில்லை
இசை அறிந்தோரும், பக்திப்பாடல்களை பாடி வருவோரும், வழிபாட்டையும், இசைப்
பாடலையும் தனித்தனியாகக் கையாண்டனர்.

மேலைநாட்டுச் சமயமான கிறிஸ்தவ சமயத்தில் இறை வழிபாடும்,இசைப்
பாடலும் ஒன்றுக்கொன்று கைகோர்த்துக்கொண்டு களிநடம் புரிந்தது.

இந்து சமய வழிபாடு, ஒரு சில நிமிடங்களில் முடிந்துவிடும்.

இசையறிந்தோர் மட்டும் தத்தம் இஷ்ட தெய்வத்தை மனம் உருகி பாடி வழிப்பட்டனர்.

அப்போதுதான் மனம் மாறி கிறிஸ்தவ சமயத்தை தழுவியவர்க்கு பாடுவதற்கு எந்த ஒரு தமிழ் பாடலும் இல்லாதிருந்தது.

அவர்களுக்கு கைகொடுத்து மேலை நாட்டில் வழிபாட்டில் பாடப்பட்ட ஆங்கிலப் பாடல்களில்
மொழிபெயர்ப்பே அதே ராகத்தில் பாடியது கைகொடுத்தது.

பிற்காலத்தில் இசை ஞானம் கொண்ட திருச்சபை மக்களும் ஆயர் பெருமக்களும் நம்
தாய்மொழியாம் தமிழில் ஆண்டவரைப் புகழ்ந்து பாடிய தூய தமிழ் இசைப் பாடல்கள்
திருச்சபைகளில் ஆங்காங்கே பெருகிற்று. ஆண்டவரை போற்றி பாடப்பட்ட மொழியாக்கம்
செய்யப்பட்ட பாடல்கள் ஞானப்பாடல்கள் என்றும், தமிழிசையில் பாடப்பட்ட பாடல்கள்
கீர்த்தனைகள் என்றும் பெயர் பெற்றது.

தஞ்சையிலே வேதநாயகம் சாஸ்திரியார் அவர்கள்
தரங்கையிலே ஞா. சாமுவேல் ஐயர் அவர்கள்
சென்னையிலே ஜி. சே. வேதநாயகம் ஐயர் அவர்கள்
சென்னையிலே பரமானந்தம் ஐயர் அவர்கள்
நாகர்கோவிலில் ஜான் பால்மர் அவர்கள்
மதுரையில் வே. சந்தியாகு ஐயர் அவர்கள்

மற்றும் நூற்றுக்கணக்காண பக்த சிரோண்மணிகளின் தேனினும் இனிய சுவை மிக்க கீர்த்தனைகளை எழுதிப் பாடி, பரமனைப் போற்றினர்.

கி.பி. 1854-ல் மதுரை வடக்கு வாசல் குருசேகர திருச்சபையில் ஆயராகப் பணிபுரிந்த வெப் ஐயர் இக்கீர்த்தனைகளின் சிறப்பை உணர்ந்து இராகத்தினால் கவரப்பட்டு, தமிழகம் எங்கும் மாட்டு வண்டியிலும், புகை வண்டியிலும், பயணித்து ஐநூறூக்கும் மேற்பட்ட கீர்த்தனைகளைத் தொகுத்துத் தந்தார் அந்த அமெரிக்க மிஷனரி, வெப்
ஐயர்.

தமிழறிஞர் உ. வே. சாமிநாத ஐயர் எவ்வாறு தமிழகம் எங்கும் சுற்றித்திரிந்து ஓலைச் சுவாடிகளில் கிடைத்த அரும்பாடல்களைத் தொகுத்து, நூல் வடிவில் கொண்டு வந்து காப்பாற்றினாரோ அதே போன்று, வெப் ஐயர் செய்தத் தொண்டு பெரிதும் போற்றப்பட வேண்டியது.

நூல் வடிவில் அவைகளை அச்சிட்டப்போது 400 பாமாலைகள் என்றும்
400 கீர்த்தனைகள், தொகுத்து வெளியிட்டனர்.

100 கீர்த்தனைகளை அப்போதே பதிப்பிலிருந்து விட்டுவிட்டனர்.

கீர்த்தனைகளின் சிறப்பை உணராத திருச்சபை மக்களும் பாடிய பாடல்களையே
திரும்பத் திரும்பப் பாடுவதாலும் அனைத்து கீர்த்தனைகளை அறிந்தவர்கள் மறைந்து
வருவதாலும் புத்தக வெளியீட்டார்கள் அதிகம் புழக்கம் இல்லாத கீர்த்தனைகள் என்று
அச்சிடாமல் விட்டுவிடுவதாலும் கீர்த்தனைகள் அழிவின் விளிம்பில் உள்ளது.

கரம்பங்குடி லுத்தரன் பள்ளி ஆசிரியர் சு. முத்துசாமி உபாத்தியாயர் எழுதிய ஓர்
அற்புதமான கீர்த்தனை ஒன்று உண்டு. "வேளை இது சபையே நித்திரையை விட்டு எழுந்திருக்க."

ஆம் இதுவே ஏற்ற வேளை, திருச்சபை மக்களே இனியும் நாம் தாமதித்தால் அற்புதமான கீர்த்தனைகள் அழிந்தே போய்விடும்.

T.K.C. ரசிகமணி எவ்வாறு கம்பராமாயணத்தை ஆய்ந்து அதில் எவ்வாறு இன்பம் கண்டு திழைத்தரோ அதைவிட பன்மடங்கு இன்பம் கீர்த்தனை தருவதை துய்க்க வரும்படி
அன்புடன் அழைக்கின்றேன்.

இனி வரும் இதழ்களில் இக்கீர்த்தனைகளின் தனித்தனிச் சிறப்புப் பற்றி ஆராய்ந்து இன்புற ஆண்டவர் தாமே நமக்கு அருள் செய்வாராக.
ஆமென்.
(தொடரும்)

கௌரவ உதவிகுரு அருள்திரு. S.S.P.M ஹரன்
TELC கூடல் நகர், மதுரை - 625018.
Cell:9842194671