கீர்த்தனை இன்பம் துய்க்க வாரீர் - பகுதி- 03

அழகுமிகு அங்கமாலை


தமிழ்யாப்பிலக்கணம் கூறும் பா வகைகள் ஆசிரியப்பா, வெண்பா, கலிப்பா, சிந்து,
அந்தாதி, அங்கமாலை போன்ற பாக்களின் ஓசை நயம் மிகவும் சிறப்புடையதாகும்.

அங்கமாலை என்பது உடலின் அங்கங்களை வர்ணித்துபாடுவது. இவ்வகை அங்கமாலை
கடவுளைப் புகழ்ந்தும் தலைவன், தலைவியின் வீரம் அல்லது அழகு பற்றி வர்ணித்து பாடுவது அங்கமாலை ஆகும்.

அங்கமாலைக்கென்று ஒரு தனி இலக்கணம் உண்டு.

கடவுளைபற்றி பாடுகிற போது "கேசாதி பாதம்" என்ற முறையில் இருக்க வேண்டும். அதாவது கடவுளை புகழ்ந்து பாடுகிறபோது தலையில் இருந்து அங்கமாகப்பாடி இறுதியில் பாதத்தில் முடித்து அவரது பாதம் சரணடைவது போன்று முடிக்க வேண்டும்.

தலைவன்; தலைவியை பற்றி பாடுகிறபோது "பாதாதி கேசம்" பாட வேண்டும். அதாவது
பாத அழகில் ஆரம்பித்து இறுதியில் கேசத்தின் அழகைபற்றி பாடி முடிக்க வேண்டும்.

நமக்கு கிடைத்திருக்கும் ஒரே அங்கமாலை ஜீ.சே. வேதநாயகம் ஐயர் அவர்கள் பாடியதாகும்.

(1868-1932) இவர் மதுரையில் அமெரிக்க மிஷனில் பணிபுரிந்தவர்.

மதுரை அமலகுருசதகம்,
சற்குருசதகம்,
நித்யானந்த காதல்,
போன்ற நூல்களை எழுதியவர்.

"பரலோக ராஜியப்பாமாலை"
என்ற தலைப்பில் இசைபாடல்களையும் எழுதினர்.

சென்னையில் இவரது ஊழியம் மிகச் சிறப்பாக நடைபெற்றது. அக்காலக்கட்டத்தில் வில் வண்டி வைத்திருந்த போதகர் என்று இவரைப்பற்றி கூறுவார்கள். இத் தகவலை இவரது "உந்தன் திருப்பணியை உறுதியுடன் புரிய உதவாத பாவி நானே" என்ற கீர்த்தனையில் காணலாம்.

இவர் எழுதிய அங்கமாலையில் பல சிறப்புக்களை நாம் காணலாம்
.
"பணியாயோ சிரசே படியோர் பாவமே சுமந்து
அணியா முன்முடி பூண்டசிரசினை - பணியாயோ"
நெற்றியே நிமிராய்..........
கேண்மீன்னோ செவிகாள்..........
காணீரோ விழிகாள்..........
உதடே முத்தி செய்யாய்..........
துதியாயோ நாவே..........
கண்டமே நீ பாடாய்..........
நெஞ்சமே நீ அணையாய்..........
செவிப்பீர் செங்கரங்காள்..........
கால்காள் ஒடுங்களே..........
பாதங்களே நடமின்..........

என்று சிரத்தில் ஆரம்பித்து பாதங்களில் முடியும் ஓர் அற்புதமான கீர்த்தனையாகும்.

இது செஞ்சுருட்டி இராகத்தில் இருந்தாலும் திருச்சபைகளில் சங்கராபரணம் இராகத்தில் பாடப்
படுகிறது.

இக் கீர்த்தனையில் இன்னும் ஒரு சிறப்பு கர்ப்பிணிப் பெண்கள் பாடுவதற்கு மிகவும்
உகந்த பாடல். தொட்டில் பிள்ளையை வைத்து தாலாட்டுவதற்கும் இது மிகவும் பொருத்தமானது.

நீலாம்புரி இராகம் போன்று, கேட்கும் குழந்தைகள் உடனே தூங்கிவிடும்.

என் மகள் நிறைமாத கர்ப்பமாய் இருந்த போது இக்கீர்த்தனையைப் பாடியதால்,
என் பேரனுக்கு இப்போதும் தூங்குவதற்கு அந்த பாடல்தான் பாடவேண்டும்.

ஆண்டவர்தாமே பெண்களுக்கு இந்த அருமையான கீர்த்தனைமேல் பற்றுகொள்ளச் செய்வாராக. ஆமென்.
(தொடரும்).

கௌரவ உதவிகுரு. அருள்திரு. S.S.P.M ஹரன்
TELC கூடல் நகர், மதுரை - 625018.
Cell:9842194671